Fè konesans ak nou !

“HIGHER”, sig anglè ki vle di an kreyòl “Enstiti ayisyen pou oryantasyon nan domèn edikasyon siperyè ak rechèch” (Haitian Institute of Guidance for Higher Education and Research), se yon òganizasyon ki la pou devlope “konesans ak konpetans sitwayen yo dwe genyen pou travay epi kreye richès”, sa nou rele “capital humain” oswa “human capital” nan lang fransè ak anglè. Pou l ka rive fè sa, HIGHER devlope, yon bò, enfòmasyon ak done, epi yon lòt bò, echanj ak lòt peyi, nan lide pou ede dirijan yo pran bon jan desizyon k ap pèmèt modènize ansèyman sipèryè ak rechèch nan peyi dAyiti.

 

Parapò ak objektif sa a, Enstiti gen 3 fason li aji :

 

1) EKSPÈTIZ AK SISTÈM ENFÒMASYON

HIGHER devlope zouti, pwosesis ak resous pou kolekte, analize, pataje ak eksplwate done nasyonal ak entènasyonal nan lide pou ede otorite leta ak aktè prive yo pran bon jan desizyon ki gen rapò ak edikasyon siperyè ak rechèch. Se "Depatman Ekspètiz ak Sistèm Enfòmasyon (DEIS)" nan HIGHER ki responsab pati sa a.

 

2) MOBILITE ENTÈNASYONAL AK ECHANJ

Nan menm lespri sa a, Enstiti a sipòte, yon bò, mobilite entènasyonal etidyan ak chèchè ayisyen nan inivèsite lòtbò dlo, yon lòt bò, mobilite resòtisan etranje nan inivèsite an Ayiti. Echanj sa yo konsène sektè priyoritè ki gen rapò ak bezwen espesifik patnè-benefisyè lokal yo idantifye. "Depatman Mobilite ak Echanj Entènasyonal (MIED)" asire egzekisyon pati sa a.

 

3) ANSÈYMAN AK ENJENIRI PEDAGOJIK

Twazyèmman, atravè "THEHIGHER.SCHOOL”, HIGHER gide epi akonpaye etidyan ayisyen ki gen bon nivo nan syans, teknoloji, jeni ak matematik (STEM) pou ede gen aksè ak karyè syantifik entènasyonal. Gras ak akreditasyon entènasyonal li, lekòl sa a pèmèt jèn ayisyen dekroche yon diplòm bakaloreya etranje, sètifikasyon lang ak tout lòt opòtinite ki kapab fasilite mouns nan kontinye etid li aletranje. Pa bliye, THEHIGHER.SCHOOL se yon lekòl segondè, pre-inivèsite ak fòmasyon pwofesyonèl.